Sugilanon Mahitungod sa Manlin

Ni John Mark C. Sinoy

            Ang Manlin kay ilado sa tawag nga Manga, bag-o palang kini nahimo’g usa ka Baranggay. Gitawag kini’g Manga kay ang dapit naay pampang, (duol sa eskwelahan sa Elementarya sa Manlin karon) nga naay daghang basang bato. “Manga” ang gitawag sa mga Subanen para sa pulong nga “basang bato”. Kay naandan na sa mga mag-uuma nga manguha ug basang bato sa pampang para buhaton ug bairan sa ilahang mga sundang ug uban pang gamitonon sa bukid.

            Sa tuig 1960, si Baton P. Sumpo gipili usa ka Bise Alkalde sa Munisipalidad sa Buug, gisugyot niya nga himuong Baranggay ang Manga, ug ang Baranggay kay pangalanan ug “Manlin”, para pagsidungog kay Timuay Mangura Betic Tilos Manlin nga siya ang gahatag sa kayutaan nga gihimong sentro sa Barangay nga naa sa Purok 2.

            Sakop sauna ang Manlin sa Guminta, ug gibuhat gini’g Baranggay katong ika-14 sa Marso tuig 1967 nga naa sa Pambansang Balaud 3590. Ang utlanan niini, gikan sa tuo kay Guminta, sa wala kay Poblacion Buug, sa amihanan kay Lantawan ug sa habagatan kay ang Basalem. Ang katibuk-an sa Baranggay Manlin kay gilangkuban ug 928, 361. 70 sq. m. Duha ka kilometro gikan sa Baranggay Poblacion nga naay pito ka purok. Gi-unhan kini ug dumala sa mga Timuay. Ang kina-unhang Kapitan sa Baranggay kay si Librado A. Simpang ug sa karon kay si Conception Manlin- Bangquiao.